తెలంగాణ ప్రభుత్వం ఒక రాష్ట్రం.. ఒకే గుర్తింపు కార్డు జారీకి ఏర్పాట్లు చేయనుంది. ప్రజలు సులభంగా, తొందరగా రాష్ట్రంలో ఎక్కడైనా సేవలు పొందేందుకు ఫ్యామిలీ డిజిటల్ కార్డులను అందుబాటులోకి తీసుకురానుంది. ఈ గుర్తింపు కార్డుల సర్వేను సీఎం రేవంత్ రెడ్డి ఈరోజు సికింద్రాబాద్ హాకీ మైదానంలో ప్రారంభించనున్నారు. అయితే ప్రస్తుతం ఉన్న సంక్షేమ పథకాలతో పాటు మిగతా వాటి అమలు పని చేసే విధంగా డిజిటల్ కార్డులు ఉంటాయి. కుటుంబ కార్డులు తరహాలో ఫ్యామిలీ డిజిటల్ కార్డులను ఇవ్వనున్నారు. ప్రతి కుటుంబానికి ఒక గుర్తింపు నంబర్ ఉంటుంది. అలాగే కుటుంబంలోని సభ్యులకు వ్యక్తిగత నంబర్లు కూడా ఉంటాయి. కుటుంబ వివరాలు అన్ని జాగ్రత్తగా సేకరించాలని రేవంత్ సర్కార్ నిర్ణయం తీసుకున్నట్లు సమాచారం.
ఇప్పటికే అమలు అవుతున్న మహారాష్ట్ర, రాజస్థాన్, కర్ణాటక, హరియాణా రాష్ట్రాల్లో డిజిటల్ కార్డుల విధానాన్ని అధికారులు పరిశీలించారు. అన్నింటిని అధ్యయనం చేసిన తర్వాత ప్రజలకు ఉపయోగపడేలా మార్పులు చేస్తూ కొత్తగా అమలు చేయాలని ప్రభుత్వం చూస్తోంది. అయితే ప్రస్తుతానికి వైద్యారోగ్య, పౌరసరఫరాలు, ఎస్సీ, ఎస్టీ, బీసీ సంక్షేమ శాఖలకు కార్డులు అందించాలని నిర్ణయించారు. కానీ ఇంకా ఇతర సేవలనూ కూడా కలపాలని ప్రభుత్వం ఆలోచిస్తోంది. తెలంగాణ రాష్ట్రంలో పైలట్‌ ప్రాజెక్టుగా 119 పట్టణాలు, 119 గ్రామాల్లో ఫ్యామిలీ డిజిటల్ కార్డులు అందించనున్నారు. ఆరోగ్య శ్రీ కార్డుల స్థానంలో వీటిని రిప్లేస్ చేయనుంది. ఈ డిజిటల్ కార్డుల సర్వేలో పర్యవేక్షణ కోసం కొందరు స్పెషల్ ఆఫీసర్లను కూడా ప్రభుత్వం నియమించింది.
